Lot 1115, Jalan Utama, 93450, Kuching, Sarawak
A- A A+

Komoditi lada udah meri penguntung ngagai Sarawak

Komoditi lada udah meri penguntung ngagai Sarawak Oleh  Rengenyan Labang
 
APC Borneopost2
 

KUCHING: Komoditi lada ngayanka penyungkak sereta udah meri penguntung besai kelebih agi ngagai pemansang ekonomi raban bansa menua pesisir nengeri tu.

Sapit Menteri Kebun Bedandang Besai enggau Komoditi, Datuk Datu Nasrun Datu Mansur madah, nya mega ulih nyendiaka peluang gawa kelebih agi di Sarawak.

Iya madahka perintah amat beterima kasih ngagai 67,304 iku pekebun mit lada ke alai ari penyampau nya bisi 95 peratus raban Bumiputera ti sama ngemajuka industri lama menua.

“Kenyau beberapa taun ke udah, komoditi lada udah ngayanka penyungkak ti meri peransang sereta udah meri penguntung ngagai pemansang raban bansa di menua pesisir sereta nyendiaka peluang gawa kelebih agi di Sarawak.

“Nya alai, perintah udah nyendiaka tiga inisiatif dikena nyungkak penatai pemisi pekebun mit nengah Opis Lada Malaysia (MPB) iya nya Skim Nanam Baru Lada, Skim Ngangkatka Kualiti Renggat Kebun Besai enggau Skim Usahawan Keratan & Usahawan Jual Beli.

“Dikena nyapai juluk nya, belanja sepenyampau RM16.8 juta udah diungkupka Perintah Besai dikena bejalaika skim bantu nya di Sarawak ungkup taun 2016 enggau 2017,” ku iya.

Nasrun mansutka pekara nya lebuh bejadi Majlis Anugerah Perkhidmatan Cemerlang 2016, Lembaga Lada Malaysia ke diatur ba sebuah hotel ditu, lemai kemari.

Berebak enggau tu Nasrun mega madahka komoditi lada mega mantu nambah tauka nyungkak penatai pemisi eksport menua ninting taun.

Ba taun 2016, eksport lada menua tu bisi 12,199 tan metrik enggau penyampu rega eksport bisi RM490.2 juta, ti ngayanka penurun mimit iya nya 4.6 peratus, dibandingka ba taun 2015 berega RM513.9 juta, ketegal Vietnam pengeluar lada ke pemadu besai ba taun nyin kemari.

Palan ekport lada menua diatu ku iya, Jepun enggau rega ekport sepenyampau RM142.9 juta ditangkanka diekport ke Korea Selatan, Taiwan, Singapura enggau China.

“Bekaul enggau pengawa ngeluarka lada, Malaysia ba tangga kelima enggau penyampau ti dikeluarka ba taun 2016 urung 29,245 tan metrik, iya nya bisi nambah sepenyampau 3.3 peratus dibandingka enggau taun 2015 28,300 tan metrik,” ku iya.

Taun 2016, pengeluar lada pemadu besai di dunya iya nya menua Vietnam enggau penyampau 140,000 tan metrik lalu ditangkan Indonesia (70,000 tan metrik), India (48,500 tan metrik) enggau Brazil 45,000 tan metrik.

Sama bisi datai ngagai pengerami nya kemari, Chairman MPB Tan Sri William Mawan Ikom, Ketuai Direktor MPB Dr. Harry Entebang, Ketuai Sekretari Kementerian Perusahaan Perladagan dan Komoditi Datuk M. Nagarajan enggau kebukai.